IMeya yaKwaDukuza ivuselele iphrojekthi yezindlu zaseMadundube ebimile iminyaka

Isithombe: Kuhloswe ukwakhiwa kwezindlu ezingu-2 259 nokuvuleka kwamathuba emisebenzi kubantu bendawo. Isithombe sithunyelwe.

IZAKHAMUZI zaseMadundube, KwaDukuza, sezinokuthile ezingakubamba ngethemba lokuthola izindlu ezisezingeni elifanele kulandela ukuvuselelwa kwephrojekthi yokuthuthukiswa kwale ndawo ebisamile kusukela ngo-2023. IMeya kaMasipala waKwaDukuza, uKhansela Siduduzo Gumede, ivule ngokusemthethweni le phrojekthi ngoLwesithathu, mhla ziyisi-7 kuMfumfu wezi-2026, ngethemba lokuthi izoletha izinguquko ezinhle empilweni yezakhamuzi.Le phrojekthi ihlose ukwakhiwa kwezindlu ezingu-2 259 endaweni engamahektha alinganiselwa ku-152, ngenhloso yokuthuthukisa izimo zokuhlala nokuletha izinsiza eziyisisekelo emphakathini.Ekhuluma emhlanganweni womphakathi obubanjwe ngaphambi kokuvulwa kwale phrojekthi, uGumede uthe ukuthuthukiswa kwale ndawo kuzogxila ekuletheni izindlu ezisezingeni elifanele, ukudala amathuba emisebenzi kanye nokwenza ngcono izinga lempilo yezakhamuzi.Uthe,”Le phrojekthi izoba negalelo ekubuyiseleni isithunzi somphakathi ngokuhlinzeka ngezindlu ezifanele, izindlu zangasese ezisezingeni elifanele, ukuvikeleka kwamalungelo okuhlala emhlabeni kanye nezimo zokuphila ezingcono.”Le phrojekthi izokwenziwa ngezigaba, kanti imali etholakalayo njengamanje ingu-R8 million. Le mali izosetshenziselwa ukulungisa izinkinga ezikhona nokuthuthukisa ukufinyeleleka nokuphepha emphakathini.Imisebenzi ezokwenziwa ihlanganisa ukuthuthukiswa kwemigwaqo, izinhlelo zokulawula amanzi emvula, ukuhlinzekwa kwamanzi, ukwakhiwa kwamapayipi okuhambisa amanzi ngaphansi kwemigwaqo, izindonga ezisekelayo kanye nezakhiwo zokuvikela ukuguguleka komhlaba.UMasipala waKwaDukuza uthe usuzigunyazile izinhlelo zobunjiniyela eziphathelene nemigwaqo kanye nenethiwekhi yamapayipi endle, okuyingxenye ebalulekile yokuthuthukiswa kwale ndawo.“Le phrojekthi yaqalwa uMasipala waseNdwedwe, kodwa ngemuva kokushintshwa kwemingcele yomasipala ngo-2011, indawo yaseMadundube kanye nezinye izindawo zadluliselwa ngaphansi kokuphathwa kukaMasipala waKwaDukuza,” kusho uGumede.Ukuthuthukiswa kwale ndawo sekuyingxenye yohlelo lukaMasipala waKwaDukuza lokuthuthukisa izindawo zasemakhaya, kanti umasipala uzibophezele ekufezeni le phrojekthi njengomthuthukisi.Nakuba le phrojekthi yethulwa ngoMfumfu wezi-2022, umsebenzi wamiswa ngo-2023 ngemuva kokuhoxa kosonkontileka abebephethe umsebenzi ngaleso sikhathi.Ukuvuselelwa kwayo manje sekunikeza ithemba lokuthi umsebenzi ungaqhubeka, kanti umasipala uthi uzosebenzisana nosonkontileka nomphakathi ukuze kuqinisekiswe ukuthi izidingo zezakhamuzi ziyabhekelelwa.Kuhlelwe ukuba kusungulwe ikomidi elizoholwa ngabamele umphakathi elizobheka ukuqhubeka kwephrojekthi, elaziwa ngeProject Steering Committee. Kuzophinde kwamukelwe isivumelwano sokusebenzisana phakathi komphakathi nabathintekayo, esibizwa ngeSocial Compact.Kuzophinde kuqokwe isikhulu esizoxhumanisa umphakathi nephrojekthi, esaziwa ngeCommunity Liaison Officer (CLO), kuphothulwe nezinhlelo zokubamba iqhaza kwabasebenzi bendawo kanye namabhizinisi amancane, asafufusa naphakathi nendawo (ama-SMME).Lezi zinhlelo zihlose ukuqinisekisa ukuthi izakhamuzi zaseMadundube azigcini ngokuba ngabahlomula ezindlini kuphela, kodwa zithola namathuba okubamba iqhaza emisebenzini yokuthuthukiswa kwendawo yazo.Ukuvuselelwa kwale phrojekthi kuza ngesikhathi imiphakathi iqhubeka nokudinga izindlu ezifanele, izinsiza eziyisisekelo namathuba emisebenzi, okwenza ukubambisana phakathi kukamasipala nomphakathi kube yingxenye ebalulekile ekuphumeleleni kwalolu hlelo.