Kugqugquzelwa Ukuphepha Kokudla Ezikoleni

Kufundiswe abapheka ezikoleni ngokuphathwa nokuphepha kokudla.

Njengoba uNcwaba kuyiNyanga Yezokuphepha Kokudla, uPhiko Lwezempilo loMkhandlu weTheku lubambe umkhankaso wokuqwashisa abapheki nabaphathi bokudla ezikoleni eNtuzuma Library.Izisebenzi zokudla ezimele izikole ezingama-47, okubalwa kuzo amabanga aphansi naphakeme, zithole ukuqeqeshwa ngendlela efanele yokupheka, ukuphatha nokugcina ukudla ukuze kuqinisekiswe ukuthi ukudla okunikezwa abafundi kuphephile futhi kusezingeni elifanele.Ukuqeqeshwa kuqhamuke ngemuva kokuthi ukuhlolwa okujwayelekile kochwepheshe bezempilo yezemvelo kuveze ukuthi ezinye izindawo zokuphekela ezikoleni zisenezikhala ezidinga ukulungiswa, ikakhulukazi ezikoleni ezihlinzeka abafundi ngokudla ngaphansi koHlelo Lukazwelonke Lokondliwa Kwabafundi (NSNP).UNksz Welile Ngcobo, onguchwepheshe omkhulu wezempilo yezemvelo esifundeni saseNyakatho 3, uthe ukuqeqeshwa kuhlose ukusiza abaphathi bokudla ukuthi benze konke okusemandleni ukuze ukudla kube sezingeni eliphephile, kungakhathalekile izimo zezindawo abasebenzela kuzo.“Silapha ukuzofundisa abaphathi bokudla ngendlela yokupheka nokugcina izindawo zabo zihlanzekile. Kungakhathalekile ukuthi izindawo abakuzo zinjani, kuningi abangakwenza ukuqinisekisa ukuthi ukudla abakuphekayo kusezingeni elifanele futhi akubalimazi abafundi,” kusho uNgcobo.Uhlelo lwe-NSNP luhlinzeka abafundi ezikoleni zomphakathi ezidinga kakhulu ngokudla okunomsoco, ngenhloso yokuthuthukisa ukufunda, ukugxila ezifundweni kanye nempilo yabafundi.UMnyango Wezemfundo Eyisisekelo ugcizelela ukuthi ukuphepha kokudla kubalulekile ekugwemeni izifo ezibangelwa ukudla. Imithetho eyisisekelo ihlanganisa ukugeza izandla nokugcina indawo ihlanzekile, ukuhlukanisa ukudla okuluhlaza nokuphekiwe, ukupheka ukudla kahle, ukukugcina ezingeni lokushisa elifanele nokusebenzisa amanzi nezithako eziphephile.Ukuqeqeshwa kwabapheki bezikole ngaleyo ndlela kuyingxenye yemizamo yokuqinisekisa ukuthi ukudla okufinyelela kubafundi akugcini ngokuba nomsoco kuphela, kodwa kuphephile nokudla.UNgcobo unxuse abahlali abafuna ulwazi noma ukuqeqeshwa ngokuphepha kokudla ukuthi baxhumane nehhovisi lezeMpilo Yezemvelo loMkhandlu weTheku nge email ethi email at Welile.Ngcobo@durban.gov.za.