Kusungulwa uhlelo lokuthuthukisa osomabhizinisi abasafufusa esiFundeni iLembe

Isithombe: Ababe ingxenye yosomabhizinisi abathuthukisiwe. Isithombe sithunyelwe.

Inhlangano i-Enterprise iLembe iyaqhubeka nokuvulela osomabhizinisi abasafufusa amathuba okuthuthukisa amabhizinisi abo, ngenhloso yokuqinisa umnotho wesifunda nokudala amathuba okukhula. Le nhlangano ibambe iqhaza ohlelweni lokungeniswa kwabahlanganyeli ohlelweni lokuthuthukiswa kwamabhizinisi, i-Ithala IDFC Induction Programme, obelubanjelwe egumbini lemihlangano yebhodi loMnyango wezokuThuthukiswa koMnotho, ezokuVakasha nezeMvelo KwaZulu-Natal (EDTEA) esifundeni iLembe.Lolu hlelo luyingxenye yokuqaliswa kohlelo lokufukula amabhizinisi, i-Business Incubation Programme, olwesekwa uMasipala waseKhwaDukuza ngokubambisana noMnyango wezokuThuthukiswa koMnotho, ezokuVakasha nezeMvelo KwaZulu-Natal.Lolu hlelo luhlanganise ababambiqhaza abahlukene kanye nosomabhizinisi abasafufusa abavela KwaDukuza, eMandeni, eNdwedwe naKwaMaphumulo, behlangene ngenhloso yokwakha amabhizinisi aqinile nokudala amathuba omnotho azohlala isikhathi eside esifundeni.Ngalo lolu hlelo, osomabhizinisi bazothola ukwelulekwa nokuqondiswa ngochwepheshe, ukuqeqeshwa okuzothuthukisa amakhono abo okuphatha amabhizinisi, ulwazi lokuphatha izimali kanye nosizo lokuthola amathuba angabasiza ukuthi bakhulise amabhizinisi abo.Lolu hlelo alugcini ngokuqeqesha osomabhizinisi kuphela, kodwa luhlose nokubakhela izindlela zokuthi bakwazi ukusungula amabhizinisi asimeme, bathole amathuba okukhula futhi babe neqhaza elibonakalayo ekuthuthukiseni umnotho wezindawo abahlala kuzo.I-Enterprise iLembe ithi izoqhubeka nokweseka amabhizinisi amancane, amancane kakhulu naphakathi nendawo (ama-MSME), intsha, abesifazane kanye nabanye osomabhizinisi abasafufusa, ukuze bakwazi ukuthola amakhono, ulwazi namathuba adingekayo ukuze amabhizinisi abo athuthuke.Ukuthuthukiswa kwamabhizinisi endawo kubhekwe njengendlela yokukhulisa umnotho wesifunda, kwandise amathuba omsebenzi futhi kwakheke indawo evumela osomabhizinisi ukuthi baqale amabhizinisi, bawakhulise futhi bawenze aphumelele.Le nhlangano ithi ukubambisana kwezinhlaka ezahlukene nokwesekwa kosomabhizinisi kuzosiza ekwakheni umnotho wase-iLembe lapho amabhizinisi endawo ekwazi khona ukuncintisana, ukukhula nokusimama.