Uyaqhubeka umsebenzi wokuthuthukisa uhlelo lwamanzi eDarnalli

Isithombe: IMeya kaMasipala wesiFunda iLembe, uKhansela uThobani Shandu obehola uhlelo i-Operation Siyahlola. Isithombe sithunyelwe.

UMasipala wesiFunda iLembe uthi umsebenzi wokuvuselela amapayipi amanzi aseDarnall usuhambe ibanga elikhulu njengoba usungamaphesenti angu-73 usuphelile. Lokhu kuvele ngesikhathi ubuholi balo masipala buvakashele indawo okwenziwa kuyo lo msebenzi, obizwa ngeDarnall AC Mains Upgrade Project, ngaphambi kokuhlangana nezakhamuzi emhlanganweni womphakathi obubanjelwe eZamani Community Hall, eWadi 02, KwaDukuza.Lo msebenzi ubhekwe njengengxenye yemizamo kamasipala yokunciphisa ukulahleka kwamanzi ngenxa yokuvuza kwamapayipi amadala, kanjalo nokuqinisekisa ukuthi izakhamuzi zithola amanzi ngendlela ethembekile.Lolu hambo, olwaziwa ngeSiyahlola Walkabout, beluholwa iMeya kaMasipala wesiFunda iLembe, uKhansela uThobani Shandu, ehambisana noSomlomo walo masipala, uKhansela uDolly Shandu, ilungu lekomidi eliphezulu uKhansela uZondo, izikhulu zikamasipala, ithimba eliphethe lo msebenzi nabaholi bomphakathi.Ngesikhathi behlola indawo, ubuholi bukamasipala bethulelwe umbiko ngenqubekelaphambili yomsebenzi, base bezibonela mathupha izindawo lapho kushintshwa khona amapayipi nalapho kufakwa khona izixhumo zamamitha amanzi.Lo msebenzi uqalwe kulandela ukukhathazeka kwezakhamuzi ngokuvuza kwamanzi njalo kanye nokuguga kwamapayipi endaweni. Lezi zikhalo bezilokhu zivezwa emihlanganweni yokubonisana nomphakathi, lapho izakhamuzi bezicela khona ukuba kuthathwe izinyathelo zokuvuselela ingqalasizinda ukuze kunqandwe ukumosheka kwamanzi.Ekhuluma nezakhamuzi emhlanganweni womphakathi, uShandu uthe lo msebenzi ukhombisa ukubaluleka kokulalela umphakathi nokuthatha izinyathelo ezisabela ezidingweni zawo.Uthe izikhalo ezaphakanyiswa ngabahlali ngokuvuza kwamanzi nangokuguga kwamapayipi yizo ezibe nomthelela ezinhlelweni zikamasipala zokungenelela kule ndawo.Uqhube wathi umasipala utshala imali engqalasizinda yesimanje ezosiza ekwehliseni ukulahleka kwamanzi, ithuthukise ukwethembeka kokuhlinzekwa kwawo futhi iqinisekise ukuthi lo mthombo obalulekile uyatholakala nakuzizukulwane ezizayo.UShandu uphinde wagcizelela ukuthi ukubonisana nomphakathi kuyisisekelo sokuthuthukiswa kwezindawo, wathi lo msebenzi waseDarnall uwumphumela wezingxoxo ezake zaba khona nezakhamuzi eZamani Community Hall.Ngokombiko kamasipala, lo msebenzi usungamaphesenti angu-73 uqediwe, kanti imali esetshenzisiwe isingamaphesenti angu-74,8 esabelomali esibekelwe wona. Isigaba sokuqala salo msebenzi kulindeleke ukuba siqedwe ngoFebhuwari ka-2027.Lo msebenzi uhlanganisa ukuthola nokumaka izinsiza ezingaphansi komhlaba emzileni wamapayipi ongaba ngamakhilomitha angu-16,4, kanye nokushintsha amapayipi amadala ohlobo lwe-asbestos cement (AC) kufakwe amasha e-uPVC, e-HDPE nawensimbi.Kuzophinde kufakwe izixhumo zamanzi emakhaya ngamanye namamitha azokwazi ukubhaliswa ohlelweni lukamasipala. Uma sekuqediwe, kuzohlolwa bese kuqalwa ukusetshenziswa kwengqalasizinda entsha, bese kuvalwa uhlelo oludala.Kuze kube manje, sekuqediwe ukumba imisele, ukulungisa indawo yokubeka amapayipi, ukufaka ingxenye enkulu yamapayipi kanye nokusebenza ezindaweni lapho amapayipi ewela khona ngaphansi kwamabhuloho nemigwaqo. Kuphinde kwaba nenqubekelaphambili ekufakweni kwamavalvu, ekwakhiweni kwezindawo zamamitha amanzi nasekugcwalisweni kwemisele.Umsebenzi osazogxilwa kuwo uhlanganisa ukuqedela ukugcwaliswa kwemisele nokuyiqinisa, ukuqhubeka nokuxhuma amanzi emakhaya, ukufaka amanye amavalvu omoya nokusheshisa ukwakhiwa kwezindawo zamamitha amanzi.UMeya uShandu uthe ukutshalwa kwezimali engqalasizinda yamanzi kuseqhulwini ezinhlelweni zikamasipala wesiFunda iLembe.Uthe amanzi awumthombo oyivelakancane futhi obalulekile, ngakho ukuvuselelwa kwamapayipi kuzosiza ekunciphiseni ukulahleka kwawo nasekuqiniseni ukusimama kwezinsiza zamanzi emiphakathini.Izakhamuzi ezibe khona kulo mhlangano zithole ithuba lokubuza imibuzo nokuthola izimpendulo eziphathelene nokuhlinzekwa kwamanzi, ukuthuthukiswa kwengqalasizinda nezinye izinselelo ezibhekene nomphakathi waseZamani.Umasipala uthi ukuvakashelwa kwale ndawo nokuhlangana nomphakathi kuyingxenye yohlelo lokuqinisa ukuziphendulela, ukuqapha ukuqhubeka kwemisebenzi nokuxhumana ngqo nezakhamuzi ukuze izinhlelo zokulethwa kwezidingongqangi zihambisane nezidingo zazo.