UZOBA EMLAZA OWAMAGUGU NONYAKA

Luzogujelwa eMlaza usuku lwamagugu nonyaka. Isithombe sithunyelwe

Izosingathwelwa eKing Zwelithini Stadium eMlaza imigubho yoSuku Lwamagugu kuzwelonke mhla zingama-24 kuSepthemba, kanti kulo nyaka lo mgubho uzohlanganiswa noMkhosi weLembe wokuhlonipha iSilo uShaka kaSenzangakhona.Lo mcimbi uzobanjwa ngokubambisana phakathi kukahulumeni, uMbuso wamaZulu neNdlu yasebukhosini ngaphansi kwendikimba ethi “Celebrating Our Living Heritage: Strengthening the Ties That Bind Us”, egxile ekubungazeni amagugu nasekuqiniseni ubudlelwano obuhlanganisa abantu.INingizimu Afrika igubha uSuku Lwamagugu mhla zingama-24 kuSepthemba minyaka yonke, kanti uSepthemba waziwa njengeNyanga Yamagugu. Ngalesi sikhathi abantu bakhunjuzwa ngokubaluleka kokugcina amasiko, izilimi, imikhuba, umlando namagugu emiphakathi eyahlukene yakuleli.Kulo nyaka, uMkhosi weLembe uzoba yingxenye enkulu yale migubho. Lo mkhosi uhlonipha iSilo uShaka kaSenzangakhona, esaba neqhaza elikhulu ekwakheni nasekuhlanganiseni isizwe samaZulu.ISilo uShaka sabulawa mhla zingama-24 kuSepthemba 1828 KwaDukuza. Kusukela lapho, lolu suku selunencazelo enkulu esizweni samaZulu njengoba kukhunjulwa ifa laso nobuholi baso.UMkhosi weLembe usuphenduke umcimbi obalulekile wokukhumbula iSilo uShaka, ukugcinwa komlando wesizwe nokudluliselwa kolwazi namasiko ezizukulwaneni ezizayo.Ukuhlanganiswa kwalo mkhosi noSuku Lwamagugu kuzwelonke kuzophinde kuveze ukuthi amasiko esiZulu ayingxenye ebalulekile yamagugu aseNingizimu Afrika.Amagugu awagcini ezakhiweni nasezindaweni zomlando kuphela, kodwa ahlanganisa ulimi, imvunulo, imidanso, izingoma, imikhosi, izinganekwane, ulwazi lwendabuko namasiko adluliselwa ezizukulwaneni ngezizukulwane.Lo mgubho eKing Zwelithini Stadium uzoba yithuba lokuthi abantu abavela emiphakathini eyahlukene babungaze amasiko namagugu abo, ngesikhathi kugcizelelwa ubunye, ukuhloniphana nokwazisana ngomlando namasiko akha ubuwena baseNingizimu Afrika.