Zingase zibe sethubeni lokubuya izimeya zase KZN

Zisethubeni lokukhuza imbuya izimeya eziningi zasEKZN

Kubekeka emaningi amathuba okuthi zibuye izimeya eziningi zaKwaZulu-Natal, uma amaqembu azo enqoba ukhetho lohulumeni basekhaya njengoba zivela ohlwini lwabangenele ukhetho lohulumeni basekhaya.Iningi lezimeya zomasipala baKwaZulu-Natal zivela phezulu ohlwini lwabamele amaqembu azo olushicilelwe i-Electoral Commission of SA (IEC).Ezimeyeni ezingu-54, zine kuphela izimeya zaKwaZulu-Natal ezingaveli ohlwini. Izimeya ezingaveli iMeya kaMasipala waseMshwathi, uMnuz Mandla Zondi.I-ANC yahluleka ukubhalisa abazoyimela kuMasipala waseMshwathi ngaphansi kwesigaba sokwabelana kwezihlalo kubalwa amavoti, iProportional Representation (PR).IMeya kaMasipala waseDumbe, uMnuz Sibusiso "Shevu" Mkhabela, akaveli ohlwini lwabangenele ukhetho kulo masipala. UMkhabela usanda kulaxaza iNFP maqede wajoyina i-IFP. Njengamanje uvela ohlwini lwabamele i-IFP kuMasipala wesiFunda iZululand.IMeya kaMasipala waKwaMaphumulo, uNkk Zibuyisile Khuzwayo-Dlamini, ayiveli nayo ohlwini laKwaMaphumulo kodwa ivela ohlwini lwabangenele ukhetho kuMasipala wesiFunda ILembe.IMeya kaMasipala waseMpofana, uNkk Maureen Magubane, ayiveli nhlobo ohlwini lwabangenele ukhetho.Enye imeya ikusasa layo elimfiliba yiMeya kaMasipala waseMsunduzi, uMnuz Mzimkhulu Thebolla, evela ezansi nohlu lwabangenele ukhetho.UThebolla uvela kunombolo 31.Njengamanje i-ANC inamakhansela angamaPR ayisishiyagalolunye kuMasipala waseMsunduzi, nokwenza abe mancane amathuba okuthi uThebolla abuyele emkhandlwini.Ezinye izimeya aziveli kwabangenele ukhetho ngaphansi kwamaPR, zivela kwabangenele ukhetho ngaphansi kwamawadi.Lokhu kusho ukuthi uma lezi zimeya zihluleka ukunqoba ukhetho emawadini azo kuyosho ukuthi ziyohlala emakhaya.Izimeya ezingenele ukhetho ngaphansi kwamawadi, kukhona iMeya kaMasipala wesiFunda iZululand, uMnuz Michael "Mkhonyovu" Khumalo, iMeya kaMasipala waseNewcastle uMnuz Xolani Dube, iMeya kaMasipala waseMfolozi uMnuz Xolani Bhengu, iMeya kaMasipala waseMpendle, uMnuz Kwenzakufani Dlamini neMeya kaMasipala waseRichmond uMnuz Melikhaya Ngcongo.IMeya yaseMandeni uMnuz Thabani Mdlalose, neMeya yaseNdwedwe uMnuz Samuel Mfeka, bangenele ukhetho kumawadi baphinde bavele nakumaPR yize bobabili besezansi ngale ndlela yokuthi mancane amathuba okuthi bangene njengamaPR uma behlulwa emawadini.Umhlaziyi wezepolitiki waseNyuvesi yaKwaZulu-Natal, uMnuz Zakhele Ndlovu, uthe kuyamangaza ukuthi amaqembu ezepolitiki akhombisa ukubathemba abaphethe imikhandlu njengamanje.UNdlovu uthe ubelindele ukuthi kube nezinguquko komasipala abaningi ngenxa yezinkinga ezibakhungethe."Omasipala abaningi abenzanga kahle, babhekene nezinselelo eziningi. Lokhu kukwenza uzibuze ukuthi kungani amaqembu ezepolitiki ekhetha ukubuyisa abantu abehlulekile? Uyazibuza ukuthi iyiphi inqubo abayilandelile ngesikhathi bekhetha abazongena ezikhundleni? Abantu abaningi bahlulekile, umuntu onconywayo uyedwa (iMeya kaMasipala waseMngeni, uMnuz Chris) uPappas."UNdlovu uthe omasipala baKwaZulu-Natal, basazoqhubeka nokukhungathwa izinkinga uma kubuyiswa abaholi abebekhona."Le nto ikhombisa ukuthi amaqembu ezepolitiki awanendaba nezidingo zabantu abavotayo."