Nokulunga Nxumalo

Njengoba kwanda ukukhathazeka ngokwehla kwezinga lokufunda nokuqondisisa kubafundi ezweni, uMasipala wakwaMaphumulo ususebenzise imitapo yolwazi njengenkundla yokwakha isizukulwane esithanda ukufunda, ngokusingatha umncintiswano wokufunda nokubizwa kwamagama phakathi kwezikole zamabanga aphansi.

Lo mcimbi, obuhlelwe nguMnyango Wezinsizakalo Zomphakathi (Community Services) ophikweni lweMitapo Yolwazi, ubuhlanganise abafundi, othisha nabahleli bezemfundo ngenhloso yokukhuthaza isiko lokufunda, ukuqondisisa imibhalo kanye nokukhuluma ngokuzethemba ngezilimi ezahlukene. Lo mkhankaso uhambisana nomsebenzi wemitapo yolwazi wokweseka ukufunda impilo yonke nokwenza ulwazi lutholakale kubo bonke emphakathini. 

Izikole ebezincintisana zihlanganise iNyamazane Primary School, iJoel Primary School, iNsongansonga Primary School, iOcheni Primary School kanye neImushane Primary School.

Abafundi bahlolwe ikhono lokufunda ngokushelelayo, ukubiza amagama ngendlela efanele kanye nokuqonda abakufundayo. Othisha nabo bebenabafundi babo ngesikhathi kuqhubeka imincintiswano.

Nakuba umncintiswano ubugxile ekuhlomuliseni abafundi, umgomo omkhulu ukwakha uthando lwezincwadi nokwandisa ukusetshenziswa kwemitapo yolwazi emiphakathini yasemakhaya.

Ngokwewebhusayithi kaMasipala wakwaMaphumulo, imitapo yolwazi kaMasipala ayigcini ngokubolekisa izincwadi kuphela, kodwa ihlinzeka ngezinsiza zolwazi, amaphephandaba, omagazini kanye nezinhlelo zokuthuthukisa amakhono okufunda nokusesha ulwazi. Le mitapo iphinde ibe yindawo ephephile yokufunda, yokwenza ucwaningo nokuthuthukisa impilo yomphakathi. 

Ochwepheshe bezemitapo yolwazi bakholelwa ukuthi ukugqugquzela ukufunda kusenesikhathi kudlala indima ebalulekile ekuthuthukiseni amakhono okubhala, ukucabanga nokuxazulula izinkinga. Yingakho iNational Library of South Africa kanye neLibrary and Information Association of South Africa (LIASA) beqhubeka nokunxenxa imiphakathi ukuthi isebenzise imitapo yolwazi njengamathuluzi okwakha ikusasa elingcono, ngaphansi kwesiqubulo sango-2026 esithi “Reclaiming Knowledge, Empowering Futures.” 

Abafundi abaphumelele emncintiswaneni waKwaMaphumulo bazomela loMasipala emzuliswaneni olandelayo ozohlanganisa izikole ezivela kwabanye oMasipala KwaZulu-Natalingenyanga kaNcwaba.

Abahleli banethemba lokuthi impumelelo yalolu hlelo izokhuthaza izikole nabazali ukuba baqhubeke nokugqugquzela izingane ukuba zifunde ngaphandle kwamakilasi, ukuze kwakhiwe isizukulwane esinolwazi, esikwazi ukuqonda nokusebenzisa ulwazi ekuthuthukiseni impilo yaso nemiphakathi yaso.