Admin
Isithombe: Konke kuhamba kahle njengoba Kade kunikezelwa ngesitifiketi secluded Med. Isithombe sithunyelwe.
Intatheli yeSivubela Intuthuko
Inhale ikhasi elisha emlandweni wezokuvakasha eNingizimu Afrika, ngesikhathi kudluliswa ngokusemthethweni isitifiketi sokuhlala (occupation certificate) kwesinye sezakhiwo ezilindelwe ngabomvu—i-resort yeClub Med South Africa Beach and Safari eseTinley Manor, ogwini olusenyakatho KwaZulu-Natal.
Umcimbi obubanjelwe khona kule ndawo mhlaka 28 April uhlanganise abaholi Nala masala, izikhulu kanye nababambiqhaza bephrojekthi, uphawula ukuphela ngokusemthethweni kwesigaba sokwakhiwa kwale resort enkulu engamamitha-skwele angu-54,000, enezakhiwo ezingama-64, futhi emele utshalomali olubalulekile esifundazweni.
Ukutholwa kwalesi sitifiketi kuza ngemva kwenqubo ende yokuhambisana nemithetho, okubandakanye ukuhanjiswa, ukuhlolwa nokugunyazwa kwemibhalo eminingi. Sekukonke, kwacutshungulwa amaphakheji angu-12 okuhanjiswa kwemibhalo, kanye nezitifiketi zokuphothulwa ezingaba ngu-2,000 nezitifiketi zokuhambisana nemigomo, okuhlanganisa nezitifiketi zikagesi ezingu-570. Le misebenzi iphinde yahambisana nokwakhiwa kwengqalasizinda ebalulekile njengamakhilomitha angu-3.3 wamapayipi amanzi, amakhilomitha angu-8.4 kagesi wamandla aphakathi nendawo, kanye nemisebenzi yobunjiniyela eyinkimbinkimbi efana nokufakwa kwepayipi elingamamitha angu-9 ngaphansi komgwaqo uN2 kanye nokumba okuqondisiwe okungamamitha angu-40 ngaphansi komgwaqo uP467.
UMnuz Murray Collins, omele iCollins Residential, uchaze lo mzuzu njengobalulekile futhi osekunesikhathi ulindelwe. Uthe, “Kuyilanga elikhetheke kakhulu kithi ukuthola isitifiketi sethu sokuhlala, futhi sibonga uMasipala waKwaDukuza nawo wonke amalungu awo ngomsebenzi abawenzile ukwenza le phrojekthi iphumelele kangaka. Siyajabula kakhulu ngalokho okuzolethwa yile phrojekthi hhayi kuphela KwaZulu-Natal nasoGu olusenyakatho, kodwa naseNingizimu Afrika yonke; kusukela ekukhuleni kwezokuvakasha nasekwakhiweni kwamathuba emisebenzi kuya ekubekeni le ndawo emephini womhlaba. Kuthathe isikhathi eside ukufika lapha, futhi siyaziqhenya ukubona umhlaba umelelwe lapha oGwini olusenyakatho.”
Umholi wephrojekthi yeClub Med South Africa, uMnuz Chris du Toit, ugcizelele ukubaluleka kobambiswano oluqinile olwenze iphrojekthi yaba impumelelo. Uthe, “Kuyilanga elihle kakhulu kithi ukwamukela uMasipala waKwaDukuza kule ndawo ngesikhathi sidlulisa ngokusemthethweni isitifiketi sokuhlala. Lolu kube uhambo oluhlangene ngokweqiniso. Kusukela ezinsukwini zokuqala zokuklama, uMasipala ubekade ehlala enikeza amaqembu asebenza nathi eduze, bebambisana nathi masonto onke ngisho nsuku zonke ukuqinisekisa ukuthi zonke izimvume nezivumelwano ziyatholakala. Namuhla akukhulunywa nje kuphela ngokuqedwa kwe-resort, kodwa futhi ukuqaphela umthelela omkhulu ozolethwa yile ntuthuko ngokudalwa kwemisebenzi kanye nezinzuzo zomnotho zesikhathi eside emphakathini oseduze.”
Ekuphetheni lo mcimbi, iMeya yoMasipala waKwaDukuza, uKhansela Siduduzo Gumede, iveze ukubaluleka kwale ntuthuko esifundeni. Uthe, “Silapha namuhla eClub Med Resort ukuzodlulisa isitifiketi sokuhlala njengoba silungiselela ukumemezela ukuthi le ndawo seyithuthukiswe ngokuphelele. Lona utshalomali olubalulekile esifundeni sethu, njengoba kuwuhlobo lokuqala lolu, futhi sibonga abatshalizimali. Ngale ntuthuko, kudaleke amathuba emisebenzi futhi siqiniseka ukuthi ezokuvakasha kule ndawo zizokhula kakhulu. Lena iphrojekthi esezingeni eliphezulu lomhlaba, futhi sikholwa ukuthi izosiza ukuthuthukisa izimpilo zabantu bakithi baKwaDukuza.”
Ngokukhishwa kwesitifiketi sokuhlala, amaqembu asebenzayo eClub Med asevele eseqale ukusebenza kule ndawo, eqhuba amalungiselelo afaka ukuqashwa nokuqeqeshwa kwabasebenzi ngaphambi kokwethulwa kancane kancane kwe-resort. Kulindeleke ukuthi ivulwe ngokusemthethweni mhla zine kuNtulikazi 2026.
