AdminIsithombe: Intsha egxile kwezemihlalo ithole uxhaso oluzobasiza ukutshintsha izimpilo zabo. Izithombe zithunyelwe.
INTATHELI YESIVUBELA INTUTHUKO
SUYA ngokuthuthuka isibhakela sabesifazane sakwaZulu-Natal, njengoba lokhu kuvele ngokusobala ngesikhathi kubanjwa uchungechunge lwemiqhudelwano yesibhakela yabesifazane eBruntville Sport Complex eMooi River, eMidlands. Lomqhudelwano, obubizwa nge “No Weapons” All-Female Boxing Tournament, uhlelwe ngokubambisana koMnyango Wezemidlalo, Ubuciko Namasiko KwaZulu-Natal, iBoxing South Africa (BSA) kanye nabagqugquzeli besifazane kwezesibhakela okubala uNksz Zandile Malinga weStarline Promotions, u Nksz Hle Jobe kanye noNkk Nomvelo MaGcaba-Shezi weMvelo Boxing Promotions. Lomcimbi ubeyingxenye yochungechunge lwe Women in Boxing Series oluhlose ukukhulisa amathuba nokwesekwa lwamabhokisi esifazane eNingizimu Afrika.
Umqhudelwano ubuye alandele impumelelo yomcimbi osanda kwenziwa obuwaziwab nge “Fists of Thunder” owawuseThekwini, okukhombisa ukukhula kwentshisekelo kwezesibhakela kwabesifazane esifundazweni. Lomqhudelwano uphethe ngokuqoba kuka Nksz Noxolo Mkhasibe, ngaleyo ndlela wathatha isicoco esingekabi namnikazi seKwaZulu-Natal seJunior Middleweight.
Kanti uNksz Nonkululeko Mncube ukwazile ukuvikela isicoco sakhe seJunior Bantamweight ngesikhathi enqoba uNksz Thema Zuma ngamaphuzu. Kweminye imidlalo uNksz Mpile Ngubane unqobe uNksz Wendy Gcado ngesiqumo esihlukanisiwe samajaji, kwathi uNksz Lethokuhle Sibisi washiya uNksz Anoyolo Qawule nge-TKO emjikelweni wesithathu. UNksz Nolwazi Mabaso naye unqobe uNksz Misiwe Ndlovu ngamaphuzu, kanti uNksz Ayanda Ndonyela unqobe uNksz Nolwazi Mnyingwa. Ochwepheshe bezemidlalo bathi imiqhudelwano efana nale ibalulekile ekukhuseleni isibhakela sabesifazane, njengoba inikeza abashayisibhakela amathuba okuthola ulwazi, ukubonakala kanye nokuzakhela igama kulo mdlalo.
