Admin
Isithombe: Bekudingidwa ngezinselelo umphakathi obhekana nazo kanye nezixazululo. Isithombe sithunyelwe.
Intatheli yeSivubela Intuthuko
Imizamo yokusondeza izinsiza zikahulumeni emphakathini iqhubekile eMandeni lapho uMasipala waseMandeni ubambe ngempumelelo umhlangano we-Local Task Team eSibusisiwe Hall, ohlanganise izinhlaka ezahlukene zikahulumeni ngenhloso yokuxazulula izinselelo ezibhekene nomphakathi.
Lo mhlangano uyinkundla ebalulekile yokwenza ubudlelwano bokusebenzisana phakathi kweminyango kahulumeni esebenza ngaphansi kukaMasipala waseMandeni, kanye nokunikeza amalungu omphakathi ithuba lokuveza izinkinga nezikhalo zabo ngenhloso yokuthola izisombululo ezisheshayo.
Phakathi kwezinhlaka ebezihambele lo mhlangano kubalwa amaphoyisa, uMnyango Wezenhlalakahle (DSD), iSASSA, uMnyango Wezempilo, uMnyango Wezemfundo Eyisisekelo, uMnyango Wezemidlalo, Ezobuciko NamaSiko, uMnyango Wezasekhaya, uMnyango Wezokuthutha, iKZN Liquor Authority, u-ESKOM, iLegal Aid South Africa, iLembe District Municipality, kanye nezinhlangano ezingenzi nzuzo kanye namaCommunity Development Workers.
Ngalesi sikhathi, izinhlaka zikahulumeni zithole ithuba lokwethula izinhlelo zazo, ukubika ngezinsiza ezikhona kanye nokuxoxa ngezindlela zokusebenzisana kangcono ekuletheni izinsiza emphakathini. Kuphinde kwaxoxwa ngezinkinga ezithinta umphakathi okubalwa ukuphepha, izidingo zezibonelelo zikahulumeni, izinselelo zemfundo, kanye nezinkinga zokulethwa kwezinsiza ezifana nogesi namanzi.
UMasipala waseMandeni uthe imihlangano ye-Local Task Team ibalulekile ekuqinisekiseni ukuthi izinhlaka zikahulumeni zisebenza ngokubambisana, futhi isiza ekuqinisekiseni ukuthi izikhalo zomphakathi zithola ukunakwa okufanele.
