Admin
Nokulunga Nxumalo
Abathandi bebhola eMandeni bazobhema bakholwe njengoba kusaqhubeka imidlalo yokuhlungela iMandeni Mayoral Cup 2026 ebanjelwa ezinkundleni ezimbili, iMsunduze Sportground kanye neChilli Sportground, okuqale ngomhlaka-06 April 2026, kusukela ngo-09h00 ekuseni. Lemidlalo ihlelwe uMasipala waseMandeni ngokubambisana neHollywoodbets, ngenhloso yokuthuthukisa ibhola lomphakathi kanye nokuvundulula amakhono amasha entsheni yendawo.
Imidlalo yokuhlungela ibonakale idonsa izinkumbi zabalandeli bebhola njengoba amaqembu endawo ehlangene azwana amandla, kubonakala umoya wokuncintisana kanye nokuzigqaja kwamaqembu emiphakathi ehlukene yaseMandeni. Lo mqhudelwano ubalulekile njengoba uvame ukuhlanganisa amaqembu avela ezindaweni ezahlukene, unikeze abadlali ithuba lokubonakala kanye nokuthuthukisa amakhono abo.
IHollywoodbets, ngokusebenzisana neHollywood Foundation, babambe iqhaza elikhulu ekuthuthukiseni imidlalo yomphakathi KwaZulu-Natal, ikakhulukazi ibhola lentsha, ngokuxhasa imiqhudelwano ehlukene ehlose ukuthuthukisa amakhono kanye nokwakha amathuba kubadlali abasafufusa.
Abalandeli bebhola, abaholi bomphakathi kanye nabadlali bazwakalise injabulo yabo ngokubanjwa kwalo mqhudelwano, bathi iMandeni Mayoral Cup isiphenduke umcimbi obalulekile wokuhlanganisa umphakathi, ukukhuthaza intsha kanye nokuvuselela ibhola lendawo.
Lo mqhudelwano kulindeleke ukuthi uqhubeke uze ufinyelele esigabeni lapho kuzoba namaqembu azobe elwela indawo kowamanqamu, kanti uMasipala waseMandeni kanye neHollywoodbets bathe bazimisele ukuqhubeka nokweseka intuthuko yezemidlalo emphakathini.
