IMeya yaKwaDukuza uKhansela Lindile Nhaca ithi isezinhlelweni zokuthi kuguqulwe igama lenkundla yezemidlalo iLindelani Sports Field.

Lokhu iMeya ithi izokwenza ngenhloso yokuhlonipha umdlali nomqeqeshi bebhola abadutshulwa babulawa esigamekweni esenzeka eminyakeni emibili eyedlule.

Kulesi sigameko kwadutshulwa kwabulawa umqeqeshi webhola uNjabulo Cele owayeneminyaka engu-24 yobudala ngesikhathi sesigameko.

Kwabulawa nomdlali webhola uFrance Kuhuni owayeneminyaka engu-16 ngaleso sikhathi.

Lesi sigameko esashiya abantu abaningi bemangele senzeka ngomhlaka-10 ku-August ngo-2020.

“Kumqoka kakhulu ukuthi kube khona indlela laba bantu abahlonishwa ngayo. Ukuqamba kwenkundla ngamagama abo kungaba umbono omuhle kakhulu.,” kuchaza iMeya yaKwaDukuza.

IMeya ithe kwaba buhlungu kakhulu okwenzeka ngalolu suku. Ithe ngenhloso yokubakhumbula kanye nokubahlonipha kumele nakanjani kuqanjwe ngabo le nkundla yezemidlalo.

UKhansela uNhaca uveze ukuthi uzoba nezingxoxo ezijulile nabomkhandlu ukubona ukuthi lokhu kuyenzeka yini.

Uthe kodwa kumele nakanjani kugcine kwenzekile ngoba kubonakala kuyinto emqoka kakhulu.

IMeya iveze ukuthi le nkundla izokwaziwa ngegama elisha iNjabulo France Sporting Stadium.

Iqhuba iMeya ithe kuzophinde kube nomqhudelwano ozoqanjwa ngokuthi yiNjabulo France Tournament.

IMeya iphinde yahambela yomibili imindeni yalaba ababulawa ngesihluku.

Uveze nokuthi ngenhloso yokulwa nobugebengu obudla lubi kule ndawo bahlela ukuthi babe neCrime Imbizo.

Uthe inhloso enkulu yale mbizo kuzokuba kungukulwa nobugebengu kule ndawo.