Msizi Mthembu

Badele imvula bezobamba iqhaza emidlalweni yama-Indegenous Games ngesikhathi kubanjwa imidlalo yokukhetha iqembu elizomela uMasipala waKwaDukuza emidlalweni yango-2026.

Le midlalo yokukhetha ihlelwe yiHhovisi Lokuthuthukiswa Kwezemidlalo likaMasipala waKwaDukuza ngokubambisana noMnyango wezeMidlalo, ubuCiko namaSiko esifundeni iLembe.

Abahlanganyeli abazange bavinjwe amakhaza, kodwa baqhubeka nokubamba iqhaza emidlalweni ehlukahlukene yesintu, okube yithuba lokuthi intsha nabantu bomphakathi bakhombise ikhono, ukuzimisela nomdlandla kwezemidlalo.

Le midlalo ibuye yaba yinkundla yokulondoloza amagugu namasiko aseNingizimu Afrika, ikakhulukazi imidlalo yesintu eseyidluliselwa ezizukulwaneni ngezizukulwane.

Inhloso yalolu hlelo akukhona nje ukuthola abadlali abanekhono, kodwa wukukhuthaza abantu ukuba baphile impilo enempilo ngokuzivocavoca, baphinde bathole ithuba lokuzijabulisa nokuhlanganyela emisebenzini yezemidlalo.

Ekupheleni kwemidlalo, kukhishwe imiphumela kwase kukhethwa iqembu laKwaDukuza elizomela uMasipala emzuliswaneni olandelayo wemidlalo yesintu.

Leli qembu lizobhekana namaqembu azomela oMasipala baseNdwedwe, eMandeni noMaphumulo, ngaphansi kweSifunda iLembe.

Lokhu kusho ukuthi umqhudelwano wesifunda usuzoba yisinyathelo esilandelayo kulaba badlali, njengoba bezothola ithuba lokuncintisana nabanye abadlali abavela kwabanye oMasipala.

Imidlalo yesintu ibaluleke kakhulu ekugcineni amasiko ephila, njengoba inikeza intsha ithuba lokufunda ngemidlalo eyayithandwa yizizukulwane zangaphambilini, ngesikhathi iqhubeka nokwakha amakhono ayo kwezemidlalo.

Abahleli bancome amalungu omphakathi kanye nabo bonke ababambe iqhaza ekwenzeni lolu suku lube yimpumelelo, ikakhulukazi ngenxa yokuthi amakhaza awazange abaphazamise abathandi bezemidlalo.